كيف تكون راكبًا سخيفًا

اذا أردت أن تكتسب لقب اسخف راكب مواصلات ليس عليك سوى اتباع الآتى :

1-و انت قاعد فى المشروع (الميكروباص ) اتصل بالحاج ابو نورة و على صوتك ع الآخر جدا لو الحاج حسين سارقك عرف المعلم ابو نورة انك هتخرب بيته (بيت الحاج حسين طبعا ) و هتخلى ايامه اسود من قرن الخروب

و لو انتى بنت اتصلى بصديقتك على الفور قوليلها و انت بتوشوشيها (بحيث يا دوب تسمعك اللى قاعدة جنبك و الكنبة اللى وراكم و اللى ورا اللى وراكم) ان امك ناوية لخطيبك على نية سودة ما فيش موسم من المواسم بيجى لكم فيه الا و ايده فاضية ليلته طين

2- لو حد قاعد جنبك فى (المشروع بردو) و عايز ينزل اوعى اوعى - و لو هتضحى بحياتك و عيالك و امهم -انك تنزل من المشروع و تخلى اللى جنبك يعدى .. ابتسم ابتسامة سخيفة ( عادى ما انت بتعمل كل دة عشان تبقى سخيف يا سخيف ) و زيح رجلك على جنب كدة و قوله عدى .. مش مهم خالص انه يتعصر او يتكعبل او يتحدف على وشه .. المهم انك تفضل متبت فى كرسى المشروع .. دة تمنه غالى جدا .. هو دخول المشروع بالساهل يا راجل

3- لو جنبك آنسة و انت راجل ( و دى ممكن تسأل فيها اى حد لو احتست و معاكش حد من صحابك اسأل السواق ) و الآنسة منعا للاحتكاك و رخامة بعض معدومى الدم و الضمير (لا لا مش انت .. انت سخيف بس ) حطت شنطتها الصغننة جنبها .. قولها شيلى الشنطة لو سمحتى او تدفعى ليك و للشنطة بعد كدة ( بتحصل و ربنا ) ..ما علينا

4_ لو انت قاعد ( فى المشروع بردو ما انت بتقضى تلت عمرك نايم و تلت فى المشروع ) و حبيت تشرب سيجارة او ترمى كلينكس بعد ما ....فيه ( مش عايزة اقرفكم بس يا جماعة ) و لقيت نفسك مش جنب الشباك عااااادى خالص مد ايدك كدة و بكوعك فى وش اللى جنبك و ارمى المنديل من الشباك او اعتبر الشباك طقطوقة السجاير بتاعتك و وش اللى جنبك مسند الفوتيه ..

5- لو كنتى بنت و نفسك تندغى مستيكة .. اندغى طبعا حقك حد يقدر يفتح بؤه .. بس اوعى تنسى البلالين و ترك ترك على ضرسك بالمستيكة مع كل ندغة لحد ما تجيبى للى جنبك العصبى و يصوت و يرمى نفسه من شباك المشروع .. عاااادى خالص .. ثبت علميا ان الشوينج بيبقى صحى للمعدة و الأسنان لو تم فى طبلة ودن اللى جنبك

6- لو انت قاعد زهقان .. ابدأ فى تشغيل الأغانى اللى على موبايلك .. و على الصوت دة اساسى ..اوعى تقلق او تحسب انك هتكون مزعج ( انت سخيف بس افتكر ) و اوعى تتخيل ان ذوقك وحش فى اختيار الاغانى اللى ع موبايلك .. أكيد ..شوف أكيد كل الناس هتتسلى معاك .. ابو الليف ماشى .. طارق الشيخ أوى أوى .. عبد الباسط حمودة يا رييييييييييت ..بس دة عادى جدا هتقولى ما سواق المشروع بيشغل اغانى من دى ساعات .. انا كدة سخيف ليه بقا ؟

لا بقا صحصح معايا .. السواق بيسيب الاغانى شغالة و بيركز فى السواقة .. انت بقا مركز فى الاغانى .. اوعى تخلى اغنية تكمل .. ابو الليف يقول : انا مش خرنج لا لا لا .. تخرسه و تقلب على طارق الشيخ .. نفسى يا دنيا نفسييييييى ... أنا مش عارفنى انا تهت منى أنا مش أناااااا ..

ايوووة برافو عليك اديك نقلت على عبد الباسط حمودة من غير ما اقولك ..

المهم الناس تعيش لحظات الاستجمام معاك و كل مطرب بيقول كلمة التانى يرد عليه بكلمة و هكذا ..و خليك كدة طول السكة

7- لو شاب روش و معاك صاحبك الروش طبعا و صادف جنبكم آنسة ..حاول بكل ما تملك تظهر خفة دمك .. بصوت عالى طبعا ..قول كل القفشات اللى فى الدنيا .. انت دمك خفيف طحن ( يا سخيف ) هى أكيد حابة تسمع ظرفك و شقاوتك .. احكى له مواقفك مع نسرين و ازاى انت ضبطها امبارح و ازاى صاحبك شيكو مش بيفهم حاجة فى الفيس بوك و غبى و حمار و انت اللى فهمته و متنساش انك من وقت للتانى تضحك و على الضحكاية على و علّى ضغطى فداك يا سيدى

8-لو صوتك وحش و ملاكش فى شغل الموبايلات و كل شوية تغير المحطة ااااقصدى الاغنية و الكلام دة .. غنى انت (و ربنا بتحصل ) غنى بقا و عيش حياتك و قول يا ليل و قول يا عين ..و اطربنا يا سيدى و اشجينا ..و يا سلام لو السواق كان مشغل أغنية يبقا عامل معاك احلى واجب هتدخل فى المود بسرعة جدا .. و الناس حواليك هتكون أخر انبساط ..كانى رحت المرسح و ببلاش يا اخواتى و لا حفلة اضواء المدينة و ليالى التليفزيون

9- لو مدخن ..و معلش بردو غصب عنك .. ليس على المريض حرج .. و البلغم على صدرك .. مفيش مشكلة خالص انك كل 3 دقايق كدة .. تحاول تتخلص منه .. عاااااااادى .. بقولك ليس على المريض حرج ايه يا راجل اللى حواليك دول كفرة .. مش قادرين يستحملوك .. الواحد مش عارف الناس جرى لها ايه .. مفيش رحمة فى قلبهم ..( و طبعا مش محتاجة أوصف لكم ازاى بيتم التخلص من المبلغم .. لا بد من وجود موسيقى مصاحبة لذلك )

10- لو طالعة المشروع و شايلة معاك بطاطين بتاعت شوار البت .. و طبعا البطانية حجمها كبير مش هتحطيها تحت رجلك و لا هتكفى حجرك لوحده .. مفيش مشكلة خالص نهااااائى فى انك تحطيها على رجلك و رجل اللى جنبك ( اللى هى مش العروسة أكيد ) و اهو فال حلو و عقبال كل البنات يا رب لوووووولوووولى

11-لو طالعة المشروع و معاك كيس خضار و كيس عيش و كيس فاكهة و كيس لب ( كل دى كياس يا حجة ) لا تترددى فى انك تلقى بكيس منهم على رجل اول حد يقابلك و اتهبدى على الكرسى و ازغدى اللى جنبك و اقعدى عليها المهم مش عايزة اللى جنبك دى تفضل سليمة شرحيها انا بقولك اهوه

......

حاولت بكل جهدى انى اساعدكم فى انكم تتعرفوا على الطريقة المثلى لكى تكون راكبا سخيفا

و يا رب اكون وفقت فى ذلك

لا تنسونى من صالح دعائكم

انا و كل الركاب