الاثنين، ٢٠ ديسمبر، ٢٠١٠

حلم ....



ما بقتش بسأل نفسى
هو أسمر ؟
و اللا أشقر؟
و اللا قمحى؟
ما باقتش فارقة
عيونه زارقة ؟
أو ملامحه من ملامحى ؟

يمكن حاولت
فى يوم
أرسم ملامحه
و اشم عطره
و أحفر بايدى
بسمته
و أبص فى عيونه
و أحدد نظرته
و اخترت له
لون بدلته !
و حلمت حتى
بسكنته و بمشيته
و ازاى هيتلاقى
طريقى بسكته
و سمعت صوته!
سمعت مرة ضحكته !
حسيت بتنهيده
دبحتنى صرخته !


يمكن حلمت كتير
و الحلم خدنى
سهرنى فى ليله
و فى بحره غرقنى
و لأمتى هافضل أجرى
ورا حلمى؟
و لأمتى هايفضل حلمى
يسبقنى ؟؟!!
______________
من أرشيفى 2006
مرسلة بواسطة في ١٠:٠٤ م

7 التعليقات:

  1. إبن النيلDec 20, 2010 11:23 PM

    كلمات جميله وقويه
    دمتي سالمه لكن إسمحيلي بالرد
    أنا مكتبتش زجل أو نثر قبل كده إلا القليل جدآ ومن قريب جدآلكني أخذت من كلماتك لأكتب
    لازم أفوق من ضحكته
    ........من بسمته
    من صوته من نظرته
    لازم ألاقي سكه تانيه غير سكته
    لازم أوصل لشط تاني غير شط بحره ورملته
    لازم أفوق من حلمه من شَدته
    أحسن هتفضل دبحاني خيانته وصرخته
    لازم أطلع من حبه من ناره من كربته
    كان بيحلف إني أغلي من روحه من أهله ما حبه وجنته
    دا مكنش حب دا مكنش حلم
    دا نار دا زيت و دم
    دا مكنش حلم...
    لازم أفوق من حلمه وأشوف حقيقته وخدعته
    و بحمد ربي إني عايش لسه في دنيته
    و هسجدله ليل نهار علي حكمه وحكمته

    ردحذف

  2. الله عليكي يا تيللي

    انتي روووعة يا نيللي

    بحب كلامك وحروفك

    مش معقووووووووووولة فعلا

    بتعيشينا جواكي وبتحسسينا بكل مشاعرك

    حقيقي رااااائعة

    ردحذف

  3. جميل ردك جداااااااا ابن النيل

    لو كنت بتكتب قليل جدا وكتابتك كدا

    أومال لو بتكتب كتير

    نصيحتي بجد دوس في الكتابة :)

    هنسمع عن شاعر كبير عن قريب :)

    ان شاء الله

    ردحذف

  4. جميلة يا نيللي الاحلام بتخلينا نتخيل ونرى الكثير وحتى لو الواقع لم يأتي مماثلا لأحلامنا فيكفينا فخر أننا ممن يمتلكون ملكة التخيل والأحلام

    ردحذف

  5. أخ ابن النيل
    أبدعت فى ردك بجد
    لازم تبدأ تكتب عامى
    طالما البدايات كدة :)

    ردحذف

  6. دكتورة رواء
    و الله ما عارفة أرد
    بجد
    تسلمى لى يا رب من كل سوء
    ألجمتى لسانى بكلامك الحلو دة

    ردحذف

  7. أخت كلمات من نور .. الله على كلامك .. فعلا الحلم ملكة و نعمة كمان
    بيسعدنى مرورك دايما :)

    ردحذف

الاشتراك في: تعليقات الرسالة (Atom)