انت الوحيدة اللى بتراعى احساسى

بحبك
و مهما الناس لامونى فيكى
بحبك
و مهما خوفونى منك
بحبك
صحيح وخدانى من أهلى و من ناسى
و كل ما أحاول أهرب..قلبى بيقاسى
بس انت الوحيدة اللى فهمانى
انت الوحيدة اللى بتراعى احساسى
أقعد معاكى ساعات و ساعات لوحدينا
و عارف انهم بيتكلموا علينا
و اقول لهم العيب فيكم و مش فينا
بس لو تحسوا عقلها..و حكمتها
بس لو تدوقوا هدوءها..و رقتها
دى هى الوحيدة
اللى فى حزنى تواسينى
و لو الناس ملّت صوت بكايا
تستعذب هى اهاتى و أنينى
و ساعات كتير بتوحشينى
و اخدك معايا لحد شط البحر
و تقوليلى اتكلم
و تسمعينى
و الناس عيونها ما بترحمش
محوطانى فى كل مكان
استكتروا عليا لحظة صفا وياكى
لحظة صفا ما بتدومش
و لما الفرحة تدق يوم على بابى
و اقول اروح ابشّر احبابى
الاقى الغيرة فى عيونهم
اروح راجع لك من تانى
و الاقيك انت اللى فكرانى
و فاتحة لى دراعاتك..بالحضن وخدانى
و انام معاكى
لحد ما يطلع علينا نهار
و اسألك
لحد امتى هاتفضل
خالية علينا الدار؟
تقوليلى سيبهم
دة انت عمرك
ما كنت فى يوم حبيبهم
و ارجع و اقول
صحيح خدتينى من اهلى و من ناسى
بس انت الوحيدة اللى فهمانى
انت الوحيدة اللى بتراعى احساسى
بحبك


يا وحدتى..